
Napulo (10) ka mga lungsod sa Bohol ang seguradong makadawat ug mga ambulansya human namunga ang mga paningkamot ni kanhi 3rd District Congressman Art Yap karon Gobernador sa Bohol.
Ang maong maayong balita gikonpirmar sa DOH pinaagi sa usa ka sulat ngadto ni Gov. Yap pinetsahan Marso 1, 2021.

Sa Facebook post, nagkanayon si Gov. Yap: “Daghang salamat DOH sa inyong paghatag ug aksyon sa atong request niadtong Deputy Speaker pa ta sa Kongreso nga mahatagan ug bag-ong ambulansya ang mga kalungsuran sa 3rd District…Atong gisiguro nga mapundohan kini sulod sa 2019 National Budget samtang naa pa ta sa Kongreso niadtong 2019…”
Naglakip sa napulo ka lungsod ang mosunod: Lila, Guindulman, Batuan, Duero, Jagna, Mabini, Pilar, Valencia, Sevilla, ug Carmen.
Sayo pa niini, naggahin usab ang Provincial Government of Bohol ug laing P400 million alang sa pag-moderno sa mga hospital sa Bohol nga gidumala sa Kapitolyo.
Mga bag-ong ekipo ug kahimanan ang gisugdan na pag apud-apod sa napulo ka mga tambalanan nga anaa sa pagdumala sa pangagamhanang probinsyal. Pagadugangan usab ang room capacity sa mga hospital.
Ang maong modernization program ni Gov. Yap miduyog usab sa pagatukoron nga bag-ong Gallares Hospital sa Cortes, Bohol nga may gigahing pundo nga P1.5 billion. Gisugdan sa Pebrero 2021 ang pagtukod sa bag-ong Gallares Hospital. (Enie Makinano)
You must log in to post a comment.