Bag-ong Dialysis Center ug PCR Lab sa Talibon Gipatukod ni Gov. Yap

Bohol Governor Art Yap nanghingusog sa pag-ugmad sa healthcare system sa kalungsoran ug sa tibuok probinsya sa Bohol.

Gibisita ni Gobernador Arthur Yap ang bag-ong dialysis center ug padayong gitukod nga PCR laboratory sa Garcia Memorial Hospital sa Talibon samtang iyang gihatud ang ayudang pinansiyal sa kabaranggayan apil didto sa Trinidad, tanan sa Segundo Distrito.

Ang bag-ong pasilidad kabahin sa modernisasyon sa 10 ka mga tambalanan sa kagamhanang probinsiyal aron lapad nga magkumplimento ang maayong healthcare system sa Bohol.

Ang gobernador gisuroy ni hospital chief Dr. Miguelito Jayoma sa dialysis center nga andam na mo-operate.

Niabot na ang mga ekipo sa ICU, chemo dialysis, Xray analog ug bag-ong ambulansiya didto nga kabahin sa P400 milyones nga modernisasyon sa mga tambalanan sa probinsiya.

Kauban ni Gov. Yap si kanhi bokal sa Bohol Jaja Jumamoy sa Segundo Distrito. Si Dr. Miguelito Jayoma (tunga sa hulagway), hospital chief, miabiabi ni Gov. Yap ug Jumamoy.

Ang dialysis center adunay 10 ka mga katre ug moserbisyo hangtud sa 24 ka mga pasyente matag adlaw.

Gibisita ni Gob. Yap ang bag-ong dialysis center ug padayon gitukod nga PCR lab sa Talibon hospital samtang gihatud niya ang ayuda sa kabaranggayan apil didto sa Trinidad.

Nagbutang si Gov. Yap og dialysis center ug PCR laboratory sa Talibon aron makaalagad sa katawhan sa Segundo Distrito imbes mobiyahe pag layo nganhi sa syudad sa Tagbilaran.

Gihatud usab sa gobernador sa mga barangay sa Talibon ug silingang lungsod sa Trinidad ang P25,000 nga tinuig nga ayuda kada barangay.

Uban ni Gov. Yap sa Trinidad sila si Mayor Judith Cajes, Vice Mayor Manuel Garcia, Board Member Frans Garcia, kanhi Board Members Jaja Jumamoy ug Agapito Avenido, ug Rhea Damalerio sa Provincial Social Welfare Office. (Ven Arigo/Primer)

Sukad napiling gobernador sa Bohol niadtong 2019, si Gov. Yap nagpalapad sa healthcare system sa probinsya pinaagi sa pagpalit ug mga modern equipment sa 10 ka hospital nga gidumala sa Kapitolyo ug pagdugang ug mga hospital building.