Modernisasyon sa Garcia Memorial Hospital sa Talibon Gisugdan

Kauban ni Gov. Yap si board member Franz Garcia ug kanhi bokal Jaja Jumamoy. Gipakita ni Dr. Miguelito Jayoma ang dakong kausaban sa ospital sa Talibon tungod sa paningkamot sa abogadong gobernador.

Nibisita ta sa Garcia Memorial Provincial Hospital sa Talibon atol sa iyang pagtuyok ug pagtunol sa tinuig nga ayuda gikan sa kagamhanang probinsyal sa mga kabarangayan sa maong lungsod.

Dakong garbo nga gipakita ni Dr. Miguelito S. Jayoma (Chief of hospital) ang bag-o ug andam sa pag-operate nga dialysis center sa maong ospital.

Gipakita usab ni Dr. Jayoma ang kasamtangang gitukod karon nga PCR Laboratory sa ospital.

Gawas niini, niabot nasab ang mga ICU equipment, Chemo Dialysis, Xray Analog ug bag-ong ambulansya.

Kini tanan lakip sa 400 million nga modernization program diin ipaubos sa pagmoderno sa 10 ka mga tambalanan sa kagamhanang probinsiyal aron mokomplimento sa lapad nga panginahanglan sa maayong healthcare system sa lalawigan sa Bohol.

Sa iyang paglingkod isip amahan sa probinsya, nakita ni Gov. Yap ang dakong panginahanglanon nga mahatagan ug maayong serbisyo sa panglawas ang mga layo sa dakbayan sa Tagbilaran.

Ang dialysis center sa maong ospital adunay 10-bed capacity ug mahimong mo-alagad hangtod sa 24 ka taw matag adlaw.

“Gipili nato nga magbutang ug dialysis center sa Talibon aron maka-alagad sa katawhan sa segundo distrito ug dili na kinahanglan mo-byahe ug layo ngadto sa syudad sa Tagbilaran,” pamahayag ni Gov. Yap.

Gipaningkamotan ni Governor Yap ang pag-modernize sa napulo ka hospital sa Bohol nga ubos sa pagdumala sa provincial government.