Serbisyo sa Katawhan Gihatod ni Gov. Yap sa Danao, Bohol

Gihatud ni Bohol Gov. Atty. Art Yap ang mga serbisyo sa gobyerno sa kabaryohan sa Bohol hilabi na sa mga makaloluoy ug huyang pinaagi sa HEART Caravan didto sa Barangay Tabok, Danao, Bohol sa adlawng Sabado, Marso 6, 2021.

Walay puas ang pagbisita ni Gov. Yap sa mga kalungsoran aron mahatod ang tabang sa pangagamhanang probinsyal.

Gidala sa gobernador ang nagkalain-laing opisina sa kagamahanang probinsyal para sa pagpanghatag ug serbisyo sa katawhan sama sa pagpanghatag ug libreng check up, libreng tambal, libreng legal services, libreng tupi, ug tabang pinansyal.

Liboan ka mga residente ang nakaangkon sa nagkalainlaing health services.

Matud pa sa gobernador, bisan pa ug gihatagan ug importansya ang mga programa batok sa Covid, giseguro niya nga dili makalimtan ang mga lokal nga mga proyekto ug mga programa para sa katawhan.

Gihangop si Gov. Yap sa katawhan sa Danao nga gipangga sa gobernador.

Gawas niini, gitunol sa gobernador ang tinuig nga ayuda gikan sa kagamhanang probinsyal ngadto sa Barangay Cantubod, Santa Fe, Cabatuan, Carbon, Magtangtang ug Taming.

Gikalipay sa mga kapitanes nga ang hinabang pinansyal sa lalawigan gihatud sa ilang tugkaran.

Mikuyog usab sa gobernador ang mga kadagkoan sa Philippine Coconut Authority (PCA) ug mitunol sa 5 thousand worth para sa di mokuwang usa ka gatos nga mga coconut farmers.

Nisuporta usab si San Miguel, Bohol Mayor Atty. Virgilio “Dodong” Mendez, kanhi NBI Director, sa mga programa ug proyekto ni Gov. Yap.

Mitambong sa maong kalihokan sila si Danao Mayor Jose Cepedoza, San Miguel Mayor Virgilio Mendez, BM Frans Garcia, BM Romulo Cepedoza, kanhi bokal Jaja Jumamoy, ug ex-BM Agapito Avenido.

Gipasalig ni Danao, Bohol Mayor Jose Cepedoza ang tiunay nga suporta sa administrasyon ni Gov. Yap nga nag-atiman sa katawhan sa Danao.
Mihugop ang katawhan sa Danao aron maka-avail sa HEART Caravan ni Governor Yap.