Talibon Gibuboan ug mga Tabang, Proyekto ni Gov. Yap

Sa iyang kadasig sa pag-alagad sa mga Bol-anon, si Governor Atty. Art Yap mibisita ug nagapud-apud sa tinuig nga tabang pinansyal sa kagamhanang probinsyal ngadto sa mga kabarangayan sa Talibon bag-ohay pa lang.

Baynte singko (25) ka mga kapitanes ang midawat sa ilang cheke isip tabang pinansyal sa mga proyekto sa ilang mga barangay nga personal gitunol sa gobernador aron makahimamat ug madungog ang ilang mga tingog.

Gidasig ni Gov. Arthur Yap ang mga kapitanes sa lungsod sa Talibon nga magmalig-on taliwala sa Covid crisis.

Ang mga nakadawat mao ang Brgy. Sto. Niño, Burgos, Bagacay, Rizal, Tanjalige, Sikatuna, San Pedro, Mahanay, Guindakpan, Calituban, Sag, Cataban, Nocnocan, Busalian, Suba, San Francisco, Poblacion, San Carlos, San Isidro, San Jose, Balintawak, Magsaysay, San Agustin, Samura ug San Roque.

Gihangop sa mga kapitanes sa Talibon ang gobernador ug gipasalamatan tungod sa mga tabang ug proyekto nga gihatag sa katawhan.

Gawas sa pinansyal nga assistance, gipaabot usab ni Gov. Art ang mga umaabot nga mga proyekto sa lungsod ug iyang gisiguro nga bisan pa ug importante ang mga anti-covid programs sa probinsya sa pagka-karon, dili mahimong kalimtan ug biyaan ang mga lokal nga proyekto.

Si Mayor Janette Garcia mihatag ug dugang kasayoran kabahin sa kaugmaran sa lungsod sa Talibon atol sa pagbisita ni Gov. Yap.

Sa iyang Facebook page, si Talibon Mayor Janette Garcia nagkanayon:

“Despite sa daghan kaayo nga mga pagpang daot, mapasalamaton tang mga Talibongnon kay kina pinanggaan ta sa atong gobernador ug iya nang gipakita through sa kinadaghanang mga projects nga iyang gihatag sa atong lungsod. ❤️”

Si Mayor Garcia midugang sa pagsulti pinaagi sa iyang Facebook account: “Kagahapong adlawa mibisita ang atong halangdong gobernador sa probinsya sa Bohol Gov. Art C. Yap alang sa pagdala ug maayong mga balita alang sa katawhang Talibongnon. 25 ka mga barangay sa atong lungsod ang nakadawat sa ilang Financial Assistance nga gidunol mismo sa atong halangdong gobernador. Gisuroy pud sa atong gobernador ang mga nahuman ug nagpadayong mga dagkong proyekto nga iyang gihatag sa atong lungsod.”

“Mapasalamaton ako sa kanunay sa atong halangdong gobernador nga wala jud magmakuwang sa pagtagad ug pagtabang sa katawhang Talibongnon,” matud ni Mayor Garcia.
Si kanhi bokal sa Segundo Distrito Jaja Jumamoy nga karon international pilot namulong atubangan sa mga kapitanes sa Talibon.

Sa maong pagbisita sa mga barangay, kauban sa gobernador sila si Mayor Janette Aurestila-Garcia, Vice-Mayor Dave Evangelista, BM Frans Garcia, BM Restituto Auxtero, kanhi bokal sa Segundo Distrito Jaja Jumamoy, Rhea Damalerio (OPSWD), Former BM Agapito Avenido ug mga opisyales sa barangay.

Gihangop si Gov. Yap sa mga opisyales sa mga barangay sa Talibon.
Ang maong pagbisita sa gobernador sa mga kabarangayan sa Talibon kauban si BM Franz Garcia, BM Restituto Auxtero, ug kanhi mga bokal Jaja Jumamoy ug Agapito Avenido.