3 Classroom Buildings Gi-turnover ni Gov. Yap sa Lungsod sa San Isidro

*Giseguro ni Gov. Yap nga maandam ang mga tulonghaan inig balik sa mga estudyante kung ma-normal na ang klase.*

Gipangunahan ni Bohol Governor Atty. Art Yap ang turnover sa tulo ka classroom building sa lungsod sa San Isidro niadtong byernes, Marso 5, 2021.

Gi-turn over ngadto sa Caimbang Elementary School ang duha ka classroom building nga adunay PWD toilets ug usa ka classroom building nga adunay susamang CR ngadto sa Candungao High School kagahapong adlawa.

*Nagatuo ang pangagamhanang probinsyal nga ang pag-ugmad sa edukasyon sa Bohol magsangkap sa katakos sa mga batan-on sa pag-asdang sa globalisasyon.*

Dakong kalipay ug pasalamat sa mga magtutudlo ug ginikanan sa duha ka eskwelahan nga na-turn over na gyod ang mga classroom nga dugay na nilang gipangandoy diin natukod kini sa pagpaningkamot ug pag-aprubar ni Gov. Art Yap sa ilang request.

*Ang maong mga bag-ong classroom gipahaom sa panginahanglan sa modernong edukasyon.*

Gawas niini, gitunol usab sa gobernador ngadto sa barangay Abihilan ,Cansague norte, Cansague Sur, Cambansag, Baunos, Caimbang, Baryong Daan, Candungao, Poblacion, Causwagan, Masonoy, ug Cabanugan ang 25 thousand pesos nga tinuig nga ayuda gikan sa kagamhanang probinsyal.

*Kauban usab ni Gov. Art si Bise Gobernador Rene Relampagos nga mainitong giabiabi ni San Isidro Mayor Diosdado “Jun” Gementiza.*

Adunay usab 5 thousand pesos nga food subsidy nga gihatag gikan sa Philippine Coconut Authority (PCA) alang sa treynta ka mga coconut farmers nga nga na-apektuhan niining pandemya.

*Isip usa ka gradwado sa management economics sa Ateneo de Manila ug banggiitang abogado, prioridad ni Gov. Yap ang pag-ugmad sa edukasyon sa lalawigan sa Bohol.*

Mitambong usab sa maong turn over sila si Vice Governor Rene Relampagos, Mayor Diosdado Gementiza, BM Frans Garcia, international pilot Jaja Jumamoy, Engr. Camilo Gasatan, Engr. Einstein Gonzales, Dr. Bianito Dagatan (DepEd Bohol Superintendent), Ginaluz Dano, Dr. Bing Lapiz, Caimbang Elementary School Staff, Candungao High School Staff ug mga barangay officials.

Share this:

Related