1,109 Barangay sa Bohol Gihataga’g Tag P100K ni Gov. Yap Para Panubig

Subsob ang financial assistance ang gihatag ni Gov. Art Yap sa mga kabarangayan sa Bohol ning panahon sa pandemya.

Padayon ang pagpanghatag ug P100,000 financial assistance ni Governor Art Yap para sa proyektong panubig sa kada barangay sa lalawigan sa Bohol.

Laing grupo sa mga barangay ang nakadawat sa gisaad sa kagamhanang probinsyal nga tabang pinansyal para sa ilang mga proyekto sa panubig atol sa ilang pagbisita sa Kapitolyo sa Lunes, Marso 8, 2021.

Si Bise Gobernador Rene Relampagos mihatag sa iyang mensahe sa pagdasig sa mga kapitan sa barangay.

Ubos sa pagdumala ni Gob. Yap, usa sa mga prayoridad ang proyekto sa panubig aron mahatagan ug higayon ang mga barangay nga dugay na nga wala makatagamtam ug tubig.

Dako ang pagsalig sa gobernador nga kon adunay saktong pondo ug ekipo, dunay daghang tinubdan sa tubig ang atong lalawigan.

Natugkad sa administrasyon ni Gov. Yap nga ang suliran sa panubig sa kada barangay kinahanglan nga sulbaron sa hinanaling panahon.

Gipahinumdum usab ni Gob. Yap nga bisan na ug malampuson nato nga na-protektahan ang Bohol batok sa Covid-19, dili nato hikalimtan ang pagsunod sa mga health protocols ug padayon nga magbaton ug kahinlo sa palibot.

Ang Bohol adunay kapin sa 1,100 ka barangay, usa sa mga probinsya sa Pilipinas nga may pinakadaghan nga barangay.

Kauban sa gobernador sila si Vice Governor Rene Relampagos, BM Aldner Damalerio, BM Elpidio Bonita, BM Ricky Masamayor, BM Frans Garcia , BM Jade Bautista, Mayor Nita Cubrado, Capt. Jaja Jumamoy ug Mita Tecson (OPSWD).

Kauban sa mga opisyales sa Kapitolyo, kauban usab sa pagpanghatag sa P100,000 sila si board member Jade Bautista, Vice-Gov. Rene Relampagos, ug kanhi BM Jaja Jumamoy.