Gov. Yap: Ipadayon ang Pagtinabangay ug Panaghiusa

Mga Kaigsuonang Bol-anon,

Niadtong Marso 3, 2021, atong gilagdaan ang Executive Order No. 17 diin mas gipasayon nato ang pag-uli sa atong mga kaigsuonang Bol-anon nga gusto mouli apil na usab ang mga APOR, mga OFW ug bisita sama sa Turista ug investor. Ang atong mga lagda ug polisiya pinasubay sa (national) IATF Resolution No. 101.

Gikan sa atong pagpatuman sa bag-ong lagda, daghan na usab ang nakapauli. Naghimo kita ug monitoring sa mga kalungsuran ug gireview ang implementasyon niini.

Niabot sa atong atensyon ang concern nga gipadangat sa atong Health and Medical Task Group sa BIATF. Matud nila, mas maayo nga usa ra ang testing protocol nga ipatuman sa mga mouli-ay ug moanhi sa atong lalawigan ilabi na nga sa karong panahuna, nisaka ang mga natakdan sa mga Returning Residents, APORS og Returning OFWs.

Ang ilang suhestiyon, kinahanglan nga ang tanan nga moabot sa Bohol, adunay Negative PCR Test sa ilang point of origin o sa lugar kung diin sila gikan sulod sa setentay dos oras sa dili pa sila mouli sa Bohol.

Mas ubos usab ang risgo nga matakdan sila sa sakit sa ilang pagpamauli tungod kay ang ilang kasakay sa eroplano o sa barko negatibo naman pud sa COVID-19.

Busa, karong adlawa, atong gipirmahan ang Executive Order No. 17-A nga nagtakda sa usa ka testing protocol alang sa tanan nga moanhi o mosulod sa atong lalawigan.

Ubos niining EO No. 17-A, ang dawaton lang nga makasulod sa atong lalawigan, kadto lang adunay 72-hour Negative PCR Test. Ato ng wagtangon ang opsyon sa pagpahigayon sa test upon arrival o inig abot dinhi sa Bohol.

Akong awhag sa tanan, ipadayon nato ang pagtinabangay ug panaghiusa.

Magsinabtanay ta, ang tumong ug tuyo sa atong mga lagda mao ang pagpanalipod sa atong katawhan.

Busa ang labing importante natong buhaton karon mao ang pagsunod sa atong minimum health standards pinaagi sa pagsul-ob sa facemask kanunay, pag-observe sa physical distancing ug pirming panghunaw sa kamot. Ang agresibong prebensyon gihapon ang pinaka epektibong pamaagi nga makalikay kita sa COVID-19, with or without vaccines.

Hinaot nga ang Diyos nga Labing Gamhanan magapanalangin kanato kanunay. Daghang salamat ug God save Bohol.