Gov. Yap: Dugang Supply sa Covid Vaccine Niabot sa Bohol

Sa adlawng Domingo, 14 Marso 2021, gitaho ni Governor Art Yap ang paghidangat sa dugang supply sa Covid vaccine dinhi sa lalawigan.

Sa Facebook post, ang abogadong gobernador nagkanayon:

“Ganinang buntag nakadawat ta ug 5,140 doses sa Astrazeneca vaccines ug laing 1,340 doses sa Sinovac gikan sa DOH-R7. Ang tanang hospital (government ug private) sa Bohol ang mga benepisaryo niini.

Mapasalamaton ta sa DOH sa paghatag ug libreng bakuna para sa atong medical frontliners sa lalawigang Bol-anon.

Kasamtangan nga gi-store ang mga bakuna sa PHO Cold Chain Facility ug ato kining ipang-apod apod sa mga tambalanan sulod sa tulo ka adlaw.

Ang padayong pag-abot sa mga bakuna nagpasabot nga nagpadayon ang atong roll-out sa pagpamakuna pinaagi sa DOH.

Apan, sa gihapon, dili ta angay mokumpyansa samtang magpaabot ta sa dugang alokasyon sa bakuna alang sa katawhang Bol-anon.

Atong awhag sa tanan, sundon gihapon nato ang minimum health standards kanunay.

Daghang salamat. God save Bohol.”