Gov. Yap’s HEART Caravan Gikalipay sa Katawhan sa Anda

Alang sa mga Andahanon, si Gov. Art Yap pinangga sa dughan sa mga katawhan sukad niadtong congressman pa siya sa Tresiro Distrito.

HEART CARAVAN GOES TO ANDA, BOHOL. Gidala ni Governor Art Yap sa Myerkules, Abril 7, 2021, didto sa lungsod sa Anda ang nagkalain laing buhatan sa Kapitolyo aron ipaambit kanila ang mga serbisyo sa Pangagamhanang Probinsyal.

Gidala ni Gob. Yap ang mga serbisyo gikan sa Office of the Provincial Veterinarian (OPV), Office of the Provincial Agriculturist (OPA), Provincial Youth Development Office (PYDO), Office of the Provincial Social Welfare and Development (OPSWD), Medical Outreach Unit (MOU), Education Center ug Bohol Environment Management Office (BEMO) para ipaambit sa atong mga kaigsuonan sa Anda ang mga serbisyo gikan sa pangagamhanang probinsyal ngadto sa ilang tugkaran.

Nagkalain-laing serbisyo sa Kapitolyo ang gihatod sa tugkaran sa lumolupyo sa Anda, Bohol.

Gawas niini, gidala ug gitunol sa gobernador ang nagkalain-laing tabang pinansyal. Usa na niini ang tinuig nga barangay aid nga nagkantidad ug 25 thousand pesos para sa tanang barangay sa maong lungsod. Nakadawat sa 100 thousand pesos nga ayuda para sa panubig ang Brgy. Virgen ug Sta. Cruz, ug lain nga 200 thousand pesos para sa Brgy. Casica.

Nahinangop pag-ayo ang katawhan sa Anda nga ang amahan sa lalawigan maoy nangunay sa paghatod sa tabang pinansyal sa kabaryohan.

Lain nga gitunol sa gobernador ang honorarium para sa atong mga Barangay Livestock Aides diin gipaningkamotan niya nga mahatag kini kanila human sa dugay nga panahon nga boluntaryo nilang pagpanerbisyo. Nakadawat usab sa ilang bahin ang atong mga child day care workers isip pasalamat sa ilang dakong tabang sa pag-amoma sa mga bata hilabi na karon nga panahon sa pandemya.

Duna usab 280 ka mga boluntaryo/benepisyaryo nga nilimpyo sa mga baybayon sa Anda ubos sa Cash from Trash nga programa sa atong gobyerno diin usa kini sa gihimong prioridad ni Gob. Yap aron matabangan ang mga pamilya sa mga coastal barangays ug sa samang bahin matabangan usab ang paglimpyo sa atong kalikupan.

Kalipay sa amahan sa Probinsya nga makauban ang mga opisyales sa kabarangayan.

Gi-turn over usab ni Gob. Yap ang 297 ka mga bags nga adunay school supplies ngadto sa mga kinder hangtod Grade 6 nga mga estudyante sa Brgy. Tawid ug Brgy. Sta. Cruz isip tabang sa mga bata para sa ilang modular classes.

Mipaambit usab ang atong mga kaubanan sa Philippine Red Cross, PNP ug 47th Infantry Battalion sa ilang suporta ug nanghatag usab ug libreng serbisyo sa katawhan.

Sukad pa kaniadto ang mga Andahanon buhong sa mga programa ug proyekto ni kanhi Congressman Art Yap nga karon gobernador sa lalawigan.

Dako ang kalipay ug pasalamat sa atong gobernador sa mainitong pagdawat sa mga lumulupyo sa Anda diin daghan siya ug mga proyekto ug mga kalihokan nga napatuman sa siya nagserbisyo isip kongresista sulod sa siyam ka tuig.

Si Anda Mayor Metodio “Dodong” Amper nagpasalamat sa pangagamhanang probinsyal ubos sa pagdumala ni Atty. Art C. Yap.

Mitambong sa maong kalihokan sila si Anda Mayor Metodio Amper, San Miguel Mayor Virgilio Mendez, SB Member Absalon Deloy, SB Member Atty. Ferdinand Berongoy, ABC President Generosa Gultiano, Carmelita Tecson (OPSWD), Ginaluz Dano (EDCENTER), Portia Magallano (PTO), Romy Garcia (OPV), Dr. Rosario Tinio (Anda-MHO), Pancrasia Felizarta (DCW-In Charge), 2NDLT. Charmaine Sancho, Police Executive Master Sergeant Roger Abad (PNP), Reinerio Makinano (PRIMER), Kevin Damalerio (LGA), mga barangay kapitan ug mga opisyales.