Gov. Yap Gihugop sa Mabini Atol sa HEART Caravan

Sa lungsod sa Mabini, gibisita ni Gov. Art Yap ang mga tawo aron mahatdan sa tabang ug nagkalainlaing serbisyo.

Abril 8, 2021 – Isip amahan sa lalawigan, gipangunahan ni Governor Art Yap ang paghan-ay sa mga programa ug tabang pinansyal aron ihatod sa lungsod sa Mabini ang mga serbisyo alang sa katawhang Bol-anon.

Sa kanunay nang gibuhat, mibisita si Gob. Yap sa Brgy. Minol sa lungsod sa Mabini para ihatod ang mga serbisyo gikan sa Office of the Provincial Veterinarian (OPV), Office of the Provincial Agriculturist (OPA), Provincial Youth Development Office (PYDO), Office of the Provincial Social Welfare and Development (OPSWD), Medical Outreach Unit (MOU), Education Center ug Bohol Environment Management Office (BEMO), PNP, 47th Infantry Battalion sama sa pagpanghatag ug libreng check up, libreng tambal, libreng legal services, libreng tupi, libreng tuli ug tabang pinansyal.

Mga tambal libre nga gipanghatag sa mga tawo panahon sa HEART Caravan ni Gov. Yap.

Lain nga gidala ug gihatag sa atong gobernador ang honorarium para sa atong mga Barangay Livestock Aides diin gipaningkamotan niya nga mahatag kini kanila human sa dugay nga panahon nga boluntaryo nilang pagpanerbisyo.

Misamot kaduol sa dughan sa katawhan si Gov. Art Yap tungod sa makanunayong pagbisita sa kabaryohan.

Nakadawat usab sa pinaka-unang higayon ang atong mga child day care workers ug financial subsidy gikan sa atong kagamhanang probinsyal isip pasalamat sa ilang dakong tabang sa pag-amoma sa mga bata hilabi na karon nga panahon sa pandemya.

Adunay libreng medical check-up nga gihatag alang sa mga tawo sa Mabini.

Sa laing bahin, nanghatag usab si Gob. Yap ug mga bags nga adunay school supplies ngadto sa mga kinder hangtod Grade 6 nga mga estudyante sa Brgy. Minol isip tabang sa mga bata para sa ilang modular classes.

Si Gov. Yap naghatag mensahe sa pagdasig sa mga tawo ug opisayales sa mga barangay.

Mitambong sa maong kalihokan sila si Mabini Mayor Juanito Jayoma, Vice-Mayor Renato Tutor, San Miguel Mayor Virgilio Mendez, Board Member Elpidio Bonita, Diwa Partylist Representatives Randie and Nikki Pactol, 2ndLt Charmaine Sancho (47th IB), PCPT. Dean Reuel Tabayag (SAF), PLT. Pancratius Cabrera (COP Mabini), Carmelita Tecson (OPSWD), Romy Garcia (OPV), Dionisio Ugay (Acting BALA President) ug opisyales sa mga barangay.

Ning panahon sa pandemya, mas gipalapdan sa Kapitolyo ang mga programa sa panglawas ug agrikultura (pagkaon) sa lalawigan sa Bohol.