WORKING ON A SUNDAY: Walay puas ang pag-serbisyo ni Governor Art Yap atol sa iyang pagbisita sa lungsod sa Buenavista, Bohol para ipanghatag ang nagkalain-laing ayuda para sa katawhan karong adlawa, Abril 11, 2021.
Sa pagsugod pa lang niining pandemya, gisiguro ni Gob. Art Yap nga ang tanang pamilya sa lalawigan makadawat ug 8 kilos nga bugas isip abag ug ayuda. Karong adlawa, gibalikan sa gobernador ang pipila ka barangay sa lungsod sa Buenavista para mahatagan sa 8 kilos nga bugas ang mga pamilya nga wala pa makadawat niini.
Lain nga gidala ug gihatag usab sa atong gobernador ang honorarium para sa atong mga Barangay Livestock Aides diin gipaningkamotan niya nga mahatag kini kanila human sa dugay nga panahon nga boluntaryo nilang pagpanerbisyo.
Nakadawat usab sa pinaka-unang higayon ang atong mga child day care workers ug financial subsidy gikan sa atong kagamhanang probinsyal isip pasalamat sa ilang dakong tabang sa pag-amuma sa mga bata itilabi na karon nga panahon sa pandemya.
Gitunol usab ni Gob. Yap ang sweldo para sa mga mag-uuma nga mitrabaho ubos sa Establishment of Small Farm Reservoirs Thru Agriculture for Rural Transformation (ART) Community Project diin mitrabaho sila sulod sa napulo (10) ka adlaw diin ilang gikubkub ang yuta para makahimo ug gamay nga water reservoir.
Kauban sa gobernador sila si Buenavista Vice-Mayor Christine Torregosa, Former 2nd District Board Member Jaja Jumamoy, Former 2nd District Board Member Aga Avenido, SK Federated Pheldon Torregosa, PNP Rep. Jasper Reyes, Larry Pamugas (OPA), Romy Garcia (OPV), Carmelita Tecson (OPSWD) ug mga opisyales sa pito ka mga barangays.
You must log in to post a comment.