DUGANG 1,594 ka mga trabahante sa turismo ug nalambigit nga mga industriya sa Bohol ang modawat og ayuda nunot sa Cash Assistance Program sa kagamhanan.
Manguna si Gob. Arthur Yap karong Biyernes sa presentasyon sa mga certificate sa cash assistance nga suportado sa Department of Tourism (DOT) ug Department of Labor and Employment (DOLE).
Kini atol sa virtual press conference ug DOT-DOLE cash assistance awarding nga salmotan mismo, pinaagi sa Zoom, ni DOT. Sec. Bernadette Romulo-Puyat ug DOLE Regional Director Salome Siaton
Ang 1,594 ka mga benepisyaryo sa Bohol kabahin sa bag-ong hut-ong sa 9,625 ka mga tourism ug related worker sa rehiyon nga naaprubahan aron makadawat sa ayudang pinansiyal taliwa sa pandemya.
Hangtud sa Abril 21 ning tuiga, 8,513 na ka mga mamumuo sa turismo ug nalambigit nga mga industriya sa Bohol ang naaprubahan sa DOLE sa kantidad nga P42.5 milyones.
Kini sumala sa press briefer sa cash assistance program gikan sa buhatan sa gobernador pinaagi sa Bohol Tourism Office.
Sa 8,513, nikabat na og 4,022 ang nahatagan ug daghan pa ang mosunod human sa hugna sa assistance certificate awarding sa Biyernes.
Si Yap nakig-alayon sa DOT ug DOLE aron paspas unta ang sa pondo ubos sa Bayanihan 2 Law para sa mga trabahanteng apektado kaayo sa pandemyang labawng nihagba sa turismo.
Ang Central Visayas adunay kapin sa 9.4 milyones ka mga turista sa 2019 apan niunlod og 80,89% sa 2020 nga aduna lay 1.8 milyones.
Nitala ang Bohol og halos 1.6 milyones ka mga turista sa 2019 apan 177,341 lamang sa 2020—nikupos og 88.79%.
Tungod sa COVID-19 nga nikandado og mga establisamento ug nipahunong sa mga kalihukan sa turismo, P27.7 bilyones lamang ang total tourism receipt sa Central Visayas kon itandi sa P98.36 bilyones sa 2019. (Ven Rebo Arigo)
You must log in to post a comment.