P3,500 Educational Subsidy Gihatag ni Gov. Yap sa Matag Estudyante

Nahatagan ug tag P3,500 nga educational subsidy ang mga estudyante sa lungsod sa Dagohoy, Carmen ug Batuan, Bohol gikan sa Pangagamhanang Probinsyal.

Mga estudyante sa lungsod sa Carmen, Dagohoy ug Batuan mapasalamaton kang Governor Art Yap sa ilang pagkadawat sa Bohol Educational Subsidy atol sa gipahigayon nga HEART Caravan sa Brgy. Matin-ao sa lungsod sa Carmen, Bohol, June 2, 2021.

Nakadawat ang mga estudyante ug 3,500 pesos matag usa isip grantees sa Bohol Educational Subsidy Program (BESP) sa kagamhanang probinsyal.

Gipangusgan ni Gov. Art Yap ang paghatag ug suporta sa mga batan-ong Bol-anon sama ni Marcelo Ajoc Jr. nga makab-ot ang gidamgong edukasyon.

Gawas sa mga libreng serbisyo nga gihatag para sa katawhan sa maong barangay, gidala usab sa gobernador ang Philippine Coconut Authority (PCA) diin 17 ka mga mag-uuma ang nakadawat usab sa ilang food subsidy.

Lain nga gitunol ni Gov. Yap ang honorarium sa mga Barangay Livestock Aide nga nadawat nila sa pinakaunang higayon human sa pila ka tuig nga boluntaryong pagserbisyo.

Gitunol usab sa gobernador ang 100 thousand pesos nga tseke ngadto sa Brgy. La Libertad isip tabang sa kagamhanang probinsyal para sa ilang proyekto sa panubig.

Kauban sa gobernador sila si Matin-ao Brgy. Captain Petronilo Cabulao, La Libertad Kagawad Ana Lea Igcalinos, 47TH IB 2nd LT Charmain Sancho, Carmen Chief of Police PMAJ Jesus Daplin, BALA President Gerry Gaudicos, Matin-ao Elementary School Principal Francisco Alcular, Romy Garcia sa OPV, Ginaluz Dano sa EdCenter ug Portia Magallano sa PTO.