Bag-ong Loon Hospital Padung Nang Makumpleto

Usa sa nakalangay sa proyekto ang pagpili ug pag-angkon sa goberno sa labing luwas ug tukmang nga dapit para sa bag-ong tambalanan human sa linog basi sa ekspertong pag-estudyo ug rekomendasyon.

Report ni Ven Rebo Arigo

IPATUMAN na ang ikaduhang hugna sa konstruksyon nga maoy mokumpleto sa pagkatukod sa bag-ong tambalanan sa Loon nga nahimutang sa barangay Canhangdon Occidental.

Gipirmahan di pa dugay ni Loon district hospital chief Dr. Cyrilda Tallo ang Project Procurement Management Plan 2021 sa kantidad nga P24.9 milyones aron mahuman ang tambalanan.

Nanghinaut si Tallo nga makabalhin na sila sa bag-ong tambalanan sa sunod tuig aron usab mapahiluna ang mga bag-ong ekipo ubos sa hospital modernization program sa probinsiya.

Ang tambalanan nga gitawag og Cong. Natalio Castillo Memorial Hospital usa sa 10 ka mga tambalanan nga gidumala sa kagamhanang probinsiyal.

Gipasalamatan ni Tallo ang Kapitolyo ubos ni Governor Arthur Yap ug Bise Gob. Rene Relampagos.

Apektado ang orihinal nga tambalanan sa kusog nga linog sa 2013 apan dunay mga parte niini nga gigamit gihapon samtang kumpletohon ang bag-ong istruktura ug pasilidad.

Gilaoman sa kasamtangang administrasyon sa Kapitolyo nga mabalik sa dili madugay ang serbisyo sa Loon Hospital.