Niabot na ang 10,000 Covid Vaccines Para sa Bohol Tourism Frontliners

Mismong si Bohol Governor Arthur C. Yap ang mitagbo sa pag-abot sa 5,000 ka Russian-made nga Gamaleya – Sputnik V ug 5,000 ka Sinovac vaccines didto sa Bohol-Panglao International Airport karong adlawa, June 16, 2021.

Nahidangat na ang 10,000 ka Covid vaccines alang sa tourism frontliners sa Bohol diin si Governor Arthur Yap ug mga opisyales sa provincial government ang mitagbo sa cargo sa Panglao International Airport. (PGBh photo)

Ang Bohol ang kinaunhang probinsya sa nasud nga magbakuna sa mga tourism workers. Mahinomduman nga mihangyo ang Gobernador ngadto sa kaulohan pinaagi sa suporta ni DOT Secretary Bernadette Romulo-Puyat ug ni Vaccine Czar Sec. Carlito Galvez Jr. diin giaprobahan sa IATF ang pagpangayo ug dugang nga COVID-19 vaccines para sa mga tourism frontliners ubos sa estratehiya ni Gob. Yap ug nga himoong ‘green zone’ ang isla sa Panglao.

Mapasalamaton si Gob. Yap ngadto ni Pres. Duterte ug sa tanang mga opisyales sa kaulohan nga nagpaluyo sa paghatag sa unang batch nga mga bakuna. Para niya, makahatag kini ug dakong kompyansa sa mga turista nga mubisita sa atong lalawigan.

Tumong sa pagprayoridad sa tourism frontliners ug mga residente sa isla sa Panglao nga mabakunahan sugod karong byernes para makab-ot ang herd immunity sa 70% nga populasyon diin dakong tabang sa paghaw-as sa industriya ubos sa direct travel bubble nga maoy gisaligang tampo sa ekonomiya sa Bohol.

Dugang impormasyon, unahon ang pagbakuna ang 7,500 tourism stakeholders nga anaa sa mga establisamentong sertipikado sa DOT ug sa lokal nga Tourism Seal of Excellence nga mao ang Ultimate Bohol Experience o UBE Seal.

Gikalipay sa mga tourism stakeholders ang paghidangat sa Covid vaccines human sa masubsob nga paningkamot ug hangyo ni Gov. Art Yap sa national government nga gahinan ang lalawigan.

Gipaabot usab ang 2,000 doses nga bakuna gikan sa Filipino-Chinese Chamber of Commerce and Industry para sa pagbakuna sa ubang essential workers.

Kauban ni Gov. Yap sa press conference sila Atty. Lucas Nunag (Chairman, Provincial Tourism Council), Dr. Yul Lopez (Spokesperson, BIATF), Engr. Albert Uy (Bohol Chamber of Commerce and Industry), Angelina Hoffman (Panglao Chamber of Commerce and Industry), Atty. Kathyrin Pioquinto (Provincial Administrator), Josephine Cabarrus (Head, Bohol Tourism Office) ug mga tourism stakeholders.