PNP Chief Mibisita sa Bohol; Relasyon Gipalig-on

Malipayong gi-abiabi ni Governor Art Yap ang Hepe sa Philippine National Police (PNP) nga si General Guillermo Lorenzo Eleazar karong adlawa, Hulyo 12, 2021, atol sa Special Mayors’ Meeting kauban ang Bohol Inter-Agency Task Force (BIATF).

Ang pagbisita ni PNP General Guillermo Lorenzo Eleazar sa Bohol nagpalig-on sa relasyon sa kapolisan ug LGUs.

Punto ni PGen Eleazar sa iyang mensahe ang kalimpyo sa mga istasyon, sa organisasyon ug sa kumunidad diin magmugna ug lig-ong pagsalig sa katawhan ngadto sa mga kapulisan diin trabaho nila ang pag-protekta sa kadaghanan.

Dugang niya, ang pagtarung ug pagpalambo sa pwersa sa kapulisan magdangat ug kahapsay ug kalinaw diin gikinahanglan usab sa pagpalambo sa ekonomiya sa probinsya.

Mitaho usab si DOH Region 7 Development Management Officer Neil John Oclarit kabahin sa pinakaulahing taho kabahin sa sitwasyon sa COVID-19 Management sa Bohol diin giawhag niya ang tanan nga musunod gihapon sa minimum health protocols para makalikay sa maong virus.

Mitambong pud sa maong meeting sila PBGen Ronnie Montejo, PMGen Rhodel Sermonia, PCol Osmundo Salibo (BPPO Director), Louie Eleazar (PNP), Marco Bombase (PNP), Vice Governor Rene Relampagos, 1st District Congressman Edgar Chatto, Mayor Marrieta Sumaylo (LMP, President), Board Members Ricky Masamayor, Aldner Damalerio, Frans Garcia, Restituto Auxtero ug Jade Baustista, Province Administrator Atty. Kathyrin Pioquinto ug mga mayor sa kalain-laing lungsod sa Bohol.